library (learnR) library (learnOpenScience)|
მოცემული ონლაინ კურსი კვლევაში ჩართულ ყველა დაინტერესებულ პირს სთავაზობს ღია მეცნიერების პრაქტიკების გათვალისწინებით, მონაცემების ანალიზისა და ვიზუალიზაციის შესწავლას. შესაბამისად, ამ კურსში გაერთიანებულია ორი მოდული. პირველ ნაწილს უძღვება ანა მამათელაშვილი. ეს ნაწილი მოიცავს ლექციებსა და სავარჯიშოებს მონაცემების ანალიზისა და ვიზუალიზაციის კუთხით R პროგრამული ენის გამოყენებით. მეორე ნაწილი, რომელსაც გიგა ხოსიტაშვილი ხელმძღვანელობს, გაგვაცნობს ღია მეცნიერების პრინციპებს. ეს ნაწილი ეხმიანება კვლევისა და მონაცემების ფართო ხელმისაწვდომობას ღია მეცნიერების სხვადასხვა პლატფორმის გამოყენებით.
ანა სამი წელია მუშაობს მონაცემთა მეცნიერებისა და მანქანური სწავლების დარგში. ამ პერიოდში მან იმუშავა სხვადასხვა პროექტებზე Eliiza-სა და Caterpillar-ში, მათ შორის, ბუნებრივი ენის დამუშავების კუთხით. ამჟამად, ანა არის მანქანური სწავლების მთავარი ინჟინერი Quantori-ში. აკადემიურ პროფესიულ წარსულში მან შეისწავლა მათემატიკა, კერთოდ სიმრავლური ტოპოლოგია. ანა ატარებდა კვლევით და საგანმანათლებლო საქმიანობას პიტსბურგისა და ობურნის (აშშ), ასევე, მელბურნის უნივერსიტეტში (ავსტრალია). იგი ფლობს პიტსბურგის უნივერსიტეტის დოქტორის ხარისხს მათემატიკაში.
გიგა ათ წელზე მეტია მუშაობს ილიას სახელმწიფო უნივერსიტეტის ბიბლიოთეკაში. ამჟამად, იგი ბიბლიოთეკის დირექტორის მოადგილის პოზიციას იკავებს. გიგას აქვს ილიაუნის მაგისტრის ხარისხი ინფორმაციის მენეჯმენტის მიმართულებით. ის ასევე სწავლობდა ტალინის უნივერსიტეტში (ესტონეტი) სამაგისტრო პროგრამაზე “ახალი მედია და ცოდნის მართვა.” 2011 წლიდან გიგამ გაიარა სასწავლო პრაქტიკები ლინშოპინგისა და უფსალას უნივერსიტეტების ბიბლიოთეკებში (შვედეთი), ვალიადოლიდის უნივერსიტეტის ბიბლიოთეკაში (ესპანეთი), ასევე პორტოსა (პორტუგალია) და მიდლსექსის უნივერსიტეტებში (გაერთიანებული სამეფო). გიგა ამჟამად განათლების სადოქტორო პროგრამის სტუდენტია. მისი კვლევის საკითხი უკავშირდება აკადემიური კეთილსინდისიერების პრინციპებს.
სწავლების მთავარი მეთოდი ვიდეოლექციებია. ლექციები ასევე მოიცავს პრაქტიკულ სავარჯიშოებს, რომლებიც შესაბამის მითითებულ ბმულზეა განთავსებული. სტუდენტს შეუძლია ლექციის პარალელურად მოამზადოს სავარჯიშოები. უფრო კონკრეტულად, კურსის მეშვეობით თქვენ ისწავლით:
- R-ის პროგრამირების საფუძვლებსა და მუშაობის ძირითად პრინციპებს;
- მონაცემების ანალიზსა და სტატისტიკას, მათ შორის, როგორ ააგოთ მოდელები და მოახდინოთ შედეგების ინტერპრეტაცია;
- მონაცემების პუბლიკაციისთვის გამზადებულ ვიზუალიზაციას ggplot2 და R-ის სხვა პაკეტების დახმარებით;
- ანალიზზე დაფუძნებული რეპორტების მომზადებას;
- როგორ ჩავატაროთ კვლევა ღია მეცნიერების პრაქტიკების გამოყენებით, მათ შორის, მონაცემების მოძიებას, აღწერასა და გაზიარებას, სხვებთან კოლაბორაციას, კვლევის პრერეგისტრაციას და პრეპრინტების გაზიარებას.